حسام خليل يقدم أمين الديب

Posted by حسام خليل in

video

كنت بقدم الشاعر الكبير أمين الديب

في احتفالية حسن البنا

تبت يدا أبي لهب

Posted by حسام خليل in

يا مصرنا فيكي العجب
والشعب من همه اكتئب
والعيشة صعب وبالبلا
والظلم أصبح للركب
نمشي نكلم نفسنا
وساعات بنضحك م التعب
لما المفروض إنهم
بيعلموا الناس الأدب
ويحافظو على أمن البلد
ويسهروا لأتفه سبب
ويهزوا أي متهم
حتى لو أتخن شنب
وينطقوه ويقرروه
ويبقى شاطر لو كدب
ويظبطوا ولاد الحرام
ويدوّروا ع اللي هرب
ويجيبوا حق المظلومين
م اللي سرق واللي نهب
ويطردوا المخربين
من قلب بيتنا اللي اتخرب
واللي اتملى بالمخبرين
وبالعساكر والرتب
وفتشوا يا سامعين
لحد ما البيت اتقلب
وصحوا كل الموجودين
وابني الصغيّر اترعب
قالي يا بابا هما ليه
بيفتشوا تحت الكنب
ويكسروا كل الحاجات
ويقلبوا كل الكتب
مش احنا بردو مواطنين
ولاّ احنا أصلا مش عرب
بص المقدم ناحيته
وركّب الوش الخشب
وقالو اسكت لاحبسك
سكت وخاف ليضرب
كل اللي فات ده مش غريب
بس اللي جي ليه العجب
يارب هد المفتري
تبت يدا أبي لهب
لو قلت مش هتصدقوا!
سرقوا من بيتي الدهب
سرقوا من بيتي الدهب
**********************
تبت يدا أبي لهب

video

محمد خيري

Posted by حسام خليل in

المهندس محمد خيري صاحب مدزنة جر شكل تم اعتقاله للمرةالثانيةلأنه شارك في قافلة فك الحصارعن غزة

أنا مصري بحب الحرية

حبسوني في بلادي الغالية

أخلوا سبيلي ورجعوا خادوني

وأخلوا سبيلي المرة التانيه

وانا دلوقتي في الزنزانة

مش على ذمة أي قضية

ولما سألني الظابط قالي:

يظهر خيبتك خيبة قوية

كان إيه دخلك بفلسطين

مالك بيهم رحت ف داهيه

قلت ياباشا عايز اتنفس

طب ليه بس مغمي عنيه

اسمك سنك أصلك فصلك

يلاّ جاوبني بسرعة شويه

مسلم واسمي محمد خيري

مش عارف ليه قبضوا عليه

وسني يادوب عدّى العشرين

وبطاقتي أدامك اهيه

من مواليد مركز سنورس

فيومي ومصري الجنسية

ومدون واسم مدونتي

جر شكل بس بحنيه

ومهندس عايز اخدم بلدي

علشان تفضل أم الدنيا

بس خدوني وجم خطفوني

من بيتي بإدين مصرية

ومكنتش هستسلم أبدا

لو كانت بإدين غربية

واللي غايظني انها مصرية

وسابت ف بلادي الحرمية

مصري وجي يكلبش إيدي

آه يا خسارة على الوطنية

مصري وجي يهاجم بيتي

ويعيش ف بطولة وهمية

فاكر إنه بيخدم بلده

لما يكلبش تاني إديه

داخل يهجم يرعب يقلب

ويصحّي الناس من حواليه

علشان يزرع فينا الخوف

علشان نفضل في السلبية

ونغمض ونسيب الظالم

ينهب مواردنا الحيوية

ونسيب أهلي وناسي ف غزة

بين الأنياب اليهودية

واسأل يا شعبي المرعوب

كل الأطراف المعنية

هو احنا بنحمي المظلوم

ولاّ بنحمي الصهيونية؟

يا مصر بنادي من الزنزانة

دا انتي ف قلبي وجوا عنيه

وبحبك مهما ظلموني

وبحب كمان الحرية

وبحب الأقصى وحماس

ونفسي يا مصر تعيشي أبيه

من وحي استضافتي في ملتقى القسام

Posted by حسام خليل in





الله حسبي إنه نعم الوكيل

أرجو رضاه بحبكم قبل الرحيل

أنا لست إلا شاعر زادي قليل

يربو بكم يا أهل غزة والخليل

رباه فاجمع شملنا إني عليل

أرجو الشفاء ولست أرجو المستحيل

فأجب دعائي إنني العبد الذليل

وأذق فؤادي لذة تشفي الغليل

بشهادة في ساحة الأقصى الجليل

أنجو بها من شدة الهول الثقيل

متنعما بالحور في الظل الظليل

قوموا معي يا إخوة الصبر الجميل

وتعاهدوا : ألا نضل عن السبيل
وهتافنا لا نستقيل ولا نقيل

النشيد الوطني

Posted by حسام خليل in

قوم يا مصري
الحكومة بتناديك
سيبنا ناكلك
وابتسم وارفع إديك
ومهما يحصل
يا بطل غمض عنيك
وبلاش تعارض
سيبنا نخرب بيت أبيك
هنمص دمك
أصله دين واجب عليك
واوعى تصرخ
دا النفس محسوب عليك
خليك مسالم
إوعى تعمل فيها ديك
أحسن تلاقي
أمن جي يقبض عليك

Posted by حسام خليل in

وإذا المنيةُ أنشبت أظفارها
ألفيت كل تميمة لا تنفعُ

وتجلدي للشامتين أريهمُ

أني لريب الدهر لا أتضعضعُ

طابور الموت

Posted by حسام خليل in

دخل يزيد الرقاشي على عمر بن عبد العزيز فقال عظني يا يزيد فقال يا أمير المؤمنين اعلم أنك لست أول خليفة يموت فبكى ثم قال زدني قال يا أمير المومنين ليس بينك وبين آدم أب إلا ميت فبكى ثم قال زدني يا يزيد فقال يا أمير المؤمنين ليس بينك وبين الجنة والنار منزل فخر مغشيا عليه

كم بيني وبين آدم من الأحياء
إن رجلا ليس بينه وبين أبيه آدم أب حي لعريق في الموت
نعم ليس بيني وبين آدم أب حي
تخيلوا
أنا اللي عليا الدور
واقترب الوعد الحق
أنا واقف في أول الطابور
محدش أدامي
ابقوا افتكروني

أحمد عبد القوي

Posted by حسام خليل in



أنا طالب جايب تقدير
جيد جدا مش تزوير
عايز اسكن ف مدينة الطلبة
حقي ياباشا ، ولاّ كتير؟
ولاّ عشان أنا راجل وطني
غاوي صحافة وغاوي تصوير
ولاّ عايزني هايف تافه
أصحى وانام من غير تفكير
مصر بلدنا جوا عنيا
ليها ف قلبي حب كبير
مصر العامل والفلاح
مصر الثورة والتحرير
مصر بلدنا زرعت فينا
جرأة وحرية تعبير
مصر عرابي ومصطفى كامل
جيل الهمة والتغيير
مصر بلدنا مبتفرقش
بين أولادها وزير وغفير
ولاّ عشان بابا مش ظابط
ومهوش باشا ولاّ سفير
ومعنديش في البنك رصيد
ومعنديش دفتر توفير
بابا غلبان وبيشقى عليا
بس ف عيني عظيم وكبير
بابا سايبلي قيراطين عفة
وفدان حب بيزرع خير
وسايبلي أخلاق وشهامة
وطيبة قلب وعلم غزير
أصله ياباشا صاحب مبدأ
عمره ما باع علشاني ضمير
عمره ما وطّى لحد ياباشا
ولا نافق من يومه وزير
عمره ما خاف من مخلوق زيه
مهما يكون لو حتى أمير
قالي يا أحمد خليك راجل
ولو هتاكلها بالجرجير
خليك راجل وارفع راسك
مهما يكون الأمر خطير
اوعى تخاف من أمن الدولة
لو كتبوا ستين تقرير
ربك يابني هو المعطي
هو ال عليه التدبير
أمال إيه بقى معنى صلاتك
معنى سجودك والتكبير
خلى تكالك ع الخلقنا
هيسهلك كل عسير
أنا من حقي ياباشا سعاتك
زي زمايلي دولاب وسرير
وانا والله مواطن مصري
وظلمك ليا ملوش تبرير
عايز حقي ولو برقبتي
مش هتنازل لو هطير
حسام خليل