شاعر سبيل . . . حسام خليل

ع المكشوف

Posted by حسام خليل in زجل

ليل الخيانة بدأ ولاّ النهار نصّاب؟

والحلم فينا اتخدع ولاّ الأمل كداب؟

مين اللي واقفين هنا حرّاس على الأبواب ؟

راميين حبال المشانق تحضن الغرقان

يايموت على المشنقة يايموت غريق عطشان

والبحر طافح سولار والضرب في المليان

خلي الأمل ينفعك يا للي كرهت الجبن

انده عليه لو جدع خليه يجيب الأمن

لو كنت شاطر حسن وريني ست الحسن

الضرب تحت الحزام فن وشطارة وكهن

مين اللي خلّى العسل ميطيقش ريحة السمن

وازاي طيور الشجر حنت لعيشة السجن

والمسرحية ابتدت واللعب ع المكشوف

اقتل قتيل واعتصم واعمل عليه ملهوف

وامشي ف جنازته شهيد واقتل عشانه ألوف

واقلع أمان السنين وازرع مكانه الخوف

واجني حصاد زرعتك وارمي الأمل برّه

وانسى الصلاة والصوم لو جاتلك الدورة

وازاي هتدن مدام صوتك صبح عورة

والمجلس العسكري باع مجلس الثورة

شعر ..... حسام خليل

برج المراقبة

Posted by حسام خليل in زجل

اطلعوا برج المراقبة وارموا ع الدنيا السلام
الحكاية مش كلام مش عواطف والسلام
الغراب زي الحمام كله طاير في السما
والديابه ف كل حته والخريطة ملغمه
والملامح في المدينة ليل ضفايره معقدة
والطريق اللي انت شايفه تحت رجلك ... مصيدة
ياللي عامل فيها عنتر واحنا مش وقت الصراع
السفينة بيك هتغرق وانت ماسك في الشراع
لما نوصل بالسلامة كلنا لبر الأمان
ابقى دور ع الزعامة قبل ما يفوت الأوان

هتافات حزب الحرية والعدالة

Posted by حسام خليل in زجل

يا بن بلدنا ليه تحتار

لما تفكر مين تختار

علّم على رمز الميزان

والمنبه والحفار

ءءءءءءءء

يا بن بلدنا تعالى وقرب

حزبنا مش لسه هيجرب

احنا حزب مارسنا سياسة

ونجحنا ف ظروف حساسة

والواقع عاملينلوا دراسة

قدمنا أحسن برنامج

بكفاءة وخبرة ومناهج

ءءءءءءءءء

الحرية ما أحلاها

ويّا حبيبنا حمدي طه

والعدالة شئ جميل

ويّا عادل اسماعيل

३३३३३३३

الحرية من الايمان

والعدالة في الميزان

واحنا وراكم يا اخوان

عبد مبارك

Posted by حسام خليل in زجل

كنت ماشي الصبح بدري

شفت صاحبي حسام خليل

قلتله عيدك مبارك

قاللي ليه دمك تقيل

عيد مبارك مش سعيد

لما داق طعم الرحيل

عيد مبارك مش جمال

السنادي عيد جميل

عيد مبارك مش سرور

عيد مشفتش له مثيل

يا علمنا يا للي طالع

فوق سفارة اسرائيل

زي نور الفجر طالع

مش بيعرف مستحيل

قول لكل الدنيا وافخر

شعبنا شهم وأصيل

كل عام وانت بخير

بعد ما راح العميل

بقلم الشاعر حسام خليل

5 ممكن رأيك لو سمحت »

عيد ميلاده

Posted by حسام خليل in زجل

أجمل شئ في الكون بيفرّح
لما تشوف الورد يفتّح
وشذاه يملا الجو عطور
ويزقزق زي العصفور
لما يشقشق نور الفجر
يبدأ أول يوم في العمر
أول نبضة قلب يعيشها
أول لحظة حب وطيشها
أول همسة حب جديد
أول لمسة لأجمل إيد
واحد خمسة أسعد عيد
عيد ميلاد نور الدنيا

4 ممكن رأيك لو سمحت »

حبل الوريد

Posted by حسام خليل in زجل

ياللي شايف بحر هادي
ملمحه سهل وبسيط
ليه ما شفتش تحت منه
عمر أحزانه الغويط
لو نسيته اسمحلي اقولك
تبقى يا صاحبي ..... !
مهما تجرح مش هقولها
بردو هصبر مش هقول
يا ما دقت قبل منك
بالمحن ع الراس طبول
يا بن مصر الثورة قامت
لجل ما تغير نفوس
والعقارب مش هتمشي
وحدها من غير تروس
لو مكتش الأم ولدت
كان هييجي ازاي وليد
بص كام ضحت عشانك
قبل ما تعضلها إيد
ثورة قامت شعب واحد
قلب واحد إيد ف إيد
والتحامنا واتحادنا
هو كان حبل الوريد

يا شعب

Posted by حسام خليل in زجل

يا شعب قول كلمتك
خلّي التاريخ يسمع
متخفش من ظلمهم
ظلم السكوت أبشع
لو مش ف إيدك سلاح
دم الشهيد مدفع
اضرب بصوتك رصاص
خلّى الرئيس يركع
الصورة صورة زعيم
شهم وبطل مجدع
والأصل ندل وعميل
بيخونّا وبيخدع
يقطف زهور الربيع
ويعادي مين يزرع
يا شعب قول كلمتك
خلي التاريخ يسمع
الشعب بطّل خلاص
للظلم يوم يخضع

بر الأمان

Posted by حسام خليل in زجل

كان شئ طبيعي ومش غريب

لما السفينة اتخرمت

نغرق ونسأل عن طبيب

يلحق حياتنا اللي انتهت

من يوم ما فاس الظلم شق

سيبناه يدق

قلناله آه

منقلش لأ

والموج دخل يروي السكات

ويعطّش الصوت اللي فاضل في الضمير

لساه بيصرخ الحقوا

أشلاء ضحايا اتبعترت

يا هل السفينة اتحركوا قبل الطوفان

قوموا نجمع شملنا لبر الأمان

صوت الوجع

Posted by حسام خليل in انتخابات, زجل

اه لما تصرخ جوا منك بالوجع
نفسك أنينك صوت جراحك يتسمع
عايز تصوت بس صوتك مرتجَع
وصداه يرجك لما قهرك يحبسه
طووول النهار انا كنت واقف بحرسه
خايف لحد ينجسه
جوايا صوت
حالف يموت
لو حد حاول يخرسه
ومشيت وراه
حارس خطاه
عيني عليه
عيني عليه
مظلوم وفاكر انه رايح للعدالة تنصفه
رايح يسلم حق واضح للحرامي ينسفه
أمواج بتجري نفسها ف بر الأمان
راحت تسلم نفسها وكان اللي كان
النيل ملامحه اتغيرت
كان ليه علامة اتزورت
والخط تاااااه بين ألف خط
والشط خلى العقل شط
بر الأمان
هو اللي خان !!
هو اللي سارق قوت عيالك من زماااان
شايفين بعينا خير بلدنا بيتسرق
صوتي وصوتك جوا منا بيتخنق
فييين يوجعك
مييين يسمعك
صوتك ف صندوق البدع
اصرخ وصوت لو جدع
آه م الوجع
آه م الوجع
آه م الوجع

زوروها

Posted by حسام خليل in انتخابات, زجل

هيزوروها كل حته في البلد

ويفسحوها قبل ما ييجي الولد

ويفرجوها خير بلدنا اللي اتهبد

ويسمعوا كل المشايخ والعمد

صوت البطايق في صناديق الزُبَد

من أجلكم رشحت نفسي للأبد

1 ممكن رأيك لو سمحت »

للخلف در

Posted by حسام خليل in انتخابات, زجل

سيب المدرج للضعيف يفضل يشوف

وانزل بنفسك ملعبك وكفاية خوف

أنا وانت أصحاب البلد محناش ضيوف

----

والكلب لو حسك جبان

هيزيد نباحه ويمضغك زي اللبان

اثبت مكانك يابطل خليك شجاع

ليه سيبت بيتك يتسرق والحق ضاع

متخفش من حبة رعاع

لابسين قناع

كل العساكر دول ورق

واقفين بيحموا اللي سرق

روح قولهم فرعون غرق

والسحر باطل والقناع الزور وقع

للخلف در يا عسكري

بكفاية خوف م المفتري

وسع طريق

سيب الجرئ

وبلاش تعطل سكته

لو كنت راجل سكته

راح يدي صوته للأمين

في معركة يوم الانتخاب

متخفش من نبح الكلاب

نور

Posted by حسام خليل in زجل

بحبك مش لأنك حبتيني

بحبك

مش لأنك خلتيني

أعيش واحب واشوف بعيني

أشوف واصدق إن حد بيحتويني

رغم إنك جوا مني

بس بردو بتحتويني

ليل بيخرج من نهار

ونهار بيدخل جوا ليل

متكورين

كل واحد جي لوحده

بس مش متفرقين

مش هتفرق

مين بيغرق جوا مين

مش هتفرق

مين مغرق قلب مين

اغرقي يا نور ف قلبي

غرقيني

واحضني قلبي بقلبك

دوبيني

نور بحبك

ليه بحبك

روحي جنبك

اسأليها

قلبي عندك

اسأليه

ليه بحبك

عرفيني

آيل للسكوت

Posted by حسام خليل in تمنخابات, زجل

الدم مش دم العروق

والعزم ساكن في الشقوق

نايم بيحلم بالشروق

والضحك مش ضحك القلوب

والطَعم طًُعم بنبلعه

والأصل صورة بتخدعه

والكيف مغلف فينا خوف

مش همه لحظة الانفجار

والجوف بيغرق في المرار

مشتاق لبرشامة الرموت

تقدر تغمض ليه عنيك

المرجلة بيت عنكبوت

اشرب بعينك واتسطل

ايه يعني دمك يتْبدل

أو حتى مخك يتغسل

مالنار بتحرق في البيوت

والكل آيل للسكوت

خليك مكانك واتقتل

4 ممكن رأيك لو سمحت »

اشمعنى طيفك

Posted by حسام خليل in زجل

خلتيني اكتب قصايد
عمرها ما جات ف بالي

لما طيفك هز قلبي
يوم ما كان بيزور خيالي

الأماني الحلوة هلت
كلها غنت قبالي

و ف عيوني الفرحة طلت
روحي طارت في العلالي

والنجوم غنت معايا
والقمر سهران يلالي

آه يا عيني آه يا ليلي
يا قمر مالك ومالي

هودوه الحب يمكن؟
مين يجاوب عن سؤالي؟

يا ما غيرك جم زروني
ما جراش اللي جرالي

يبقى ليه واشمعنى طيفك
هزني أول ما جالي؟

أصل انا يا حلوة قبلك
قلبي كان عايش وخالي

لما داب في حب قلبك
ابتدا يسهر ليالي

كل دا من غير ما اشوفك
يا قمر غيرتي حالي

كل يوم اتمنى قربك ،
وانتي؟ تتمني وصالي؟

يا حبيبتي نفسي اشوفك
يا قمر يلاّ تعالي

يا حبيبتي يوم ميلادي
يوم تكوني فيه حلالي

علشان نعيش

Posted by حسام خليل in زجل

ساكن ف قلب الذبذبة
عايش على حلم السكون
بجري ورا لحظة أمل
يمكن تكون
والسكة طالت والزمن
عدّى بجنون
والناس بترجع م الطريق
راجعين يقولوا يا بشر
متكملوش
سكة سراب
ومفيش أمل
متصدقوش
والموت محاصر الانتظار
ومعاه جيوش
كل السكك متقفلة
والناس بتمشي مكملة
نمشي ونرجع ذبذبة مبتنتهيش
وعشان نعيش
لازم بحبله نعتصم
هو المهيمن والصمد
سبحانهُ
من غيره مش ممكن نعيش
والموت ف سكة ربنا
أحسن حياه
مبتنتهيش

4 ممكن رأيك لو سمحت »

رفرف وزقزق

Posted by حسام خليل in زجل

طاير ومتوكل وعارف سكته

شادي وبيدندن على لحن الأمل

صوت غنوته

رفرف وزقزق يا جدع

ربك هيرزق من وسع

افرد جناحك ع السما وافرح وطير

وارمي حمولك كلها ربك كبير

الحلم شقشق بالنهار

بعد الشقى وطول انتظار

إيدك ف إيدي نبني بكره وضحكته

من غير ما نقلق أو نخاف من طلعته

مين قد قلبك وانت طاير في السما

رايق ومش خايف ومطمن قوي

ربك خلقنا والإرادة ف دمنا

ومفيش معاه خوف من خطر بيهمنا

ومنين هييجي الخوف وليه

ما دمت متوكل عليه

سيرة

Posted by حسام خليل in زجل

يا ورد مين زيفك خلاك بقيت عيرة

رخصت ليه مسكتك وبأي تسعيرة

فين احمرار الخجل لما النسيم جالك

لو حب يستعطفك تقلب بتكشيرة

كان الحنين يقتلك لكن بتتمنع

تهرب على عفتك م الوجد والحيرة

كان الجمال كبرياء مش بس في المنظر

لكن جمال الأدب والعشرة والجيرة

والريحة كانت عجب الله عليك بيها

العطر كان من بعيد يسكر ولا البيرة

دلوقتي يا حسرتك معدش ليك ريحة

كل الإدين مسكتك ع الماشي تصبيرة

واللي مزاجه اتعوج شالك على كفه

بيشد بيك النفس يحبس بتعميرة

سبت الخسيس يقطفك وفرحت بالقطفة

وف لحظة كان جردك م النخوة والغيرة

فين راح جمال جوهرك يا لون على بلاستيك

هتفيد بإيه طلعتك بفينكة وضفيرة

معدش فيك الرجا لساك بتتمختر؟!

يا ورد سيبك بقى متفضها سيرة

احنا جيش الإسرائيل

Posted by حسام خليل in زجل

خيارات الرسائل

بقلم الشاعر الكبير محمود جمعة

قالي إبني الطفل يابا
أهل غزة يبقوا مين ؟؟
دول يهود ؟؟
قلت يا بني مسلمين !!!
قالي يعني زي دينّا
اسمهم أحمد محمد
والا ديفيد بنيامين
قلت يا بني مسلمين !!!
قال يابا مستحيل
احنا بنحاصر بلادهم
واحنا بنجوع ولادهم
ويا جيش الإسرائيل
يبقي مين المسلمين؟؟
قلت يا بني مسلمين !!!

قالى يابا بس أفهم
احنا في الكُتّاب قالو لنا
بعض آيات الكتاب
إن رب العزة حدد
الأعادي والصحاب
لما نطفي النور عليهم
أهل غزة يبقوا مين
قلت يابني مسلمين !!!

قالي يابا علمونا
إن لما ست واحدة
من رعايا المسلمين
الرومان في السوق هانوها
جت جيوش المسلمين
كل ست في غزة ماتت م الاهانة
فين جيوش المسلمين ؟؟
أهل غزة يبقوا مين
قلت يابني مسلمين !!!

قالي أبني
لو صحيح اللى انت قلته
عمي صالح يبقي مين ؟؟
عمي صالح مش ملازم في الحدود ؟؟
شفت عنده سلاح مخيف
قالي ده بيقتل ألوف
الألوف الغزاويه مين قتلهم ؟؟
عمي صالح ؟؟
والاّ جيش الإسرائيل
يابا قلي بحق ربي
أهل غزة يبقوا مين ؟؟
قلت يابني مسلمين !!!

قلت يابني هم منا
من عروقهم سال دمانا
قبلة واحدة وأمة واحدة
كل أحزانهم أسانا
حتي سيف الدين ف حربه
رجالتهم جت معانا
أهل غزة مسلمين !!!

رد قالي
مش صحيح
مش قريت عندك ياوالدي
لوحة فيها بعض آيات الكتاب
مش حكت لي
ان مسلم لما ينحاز ضد مسلم
يبقي قلب الناس دي مات
عمي صالح ساب سلاحه
يبقي عمي ؟؟
وانت قاعد بالبيجامة
جنب أمي ؟؟؟
لو صحيح الغزاويه مسلمين
انتو مين ؟؟
انتو غزة والا جيش الاسرائيل
أنتو غزة والا جيش الاسرائيل
رحت صارخ في العيال
إحنا جيش الاسرائيل
إحنا جيش الاسرائيل

نسمة أمل صافي

Posted by حسام خليل in زجل

ياشاعر قول وسمعنا

وداوي جراح بتوجعنا

وحرك حرفك الساكن

ف قلب البيت وجمعنا

على نسمة أمل صافي

وسيبنا نعيش مع المعنى

وقول الكلمة موزونة

ومن قلبك ومتعنا

ومتسيبناش لغربتنا

على الأحزان توزعنا

عشان يطلع كلام موزون

ف بحرالويل تقطعنا

وتعزفنا أنين نازل

بحد السيف يمزعنا

وننزف والنزيف جاري

بحور غرقانه بدموعنا

ف وسط البحر مش لاقيين

لا مركبنا ولا شراعنا

وليه بنصارع الأمواج

إذا كنا خلاص ضعنا

مدام سلمنا أرواحنا

لخاين بالرخيص باعنا

ولما عطشنا خلانا

شربنا الذل وشبعنا

وقلنا الذل يحيينا

أتاري كان بيخدعنا

ولا عشنا ولا متنا

ولا رحنا ولا رجعنا

ما بين دوامة تسحبنا

وبين موجه بترفعنا

ولو جانا الأمل زارع

بييجي اليأس يقلعنا

ويرمينا ف مهب الريح

وفوق الصخر يرزعنا

ونتمنى معاه الموت

نلاقي موت بيمنعنا

ياشاعر قول بإحساسك

ومن دا البحر طلعنا

دي كلمة صدق تحيينا

وع الأهوال تشجعنا

وهز القلب من جوا

ولو ما تهز ودعنا

بإيه هتفيدك القافية

إذا قلنالك اشمعنى

ولو مات الأمل فينا

كلامك مش هينفعنا

ولو قلبك مهوش نابض

بلاش تيجي تصدعنا

وخلينا مع الأموات

وهات شعرك يشيعنا

مهنحسش ولا بكلمة

وقول للصبح سمعنا

هنسمع بس بودانا

ونفضل في مواضعنا

ولا بتهز وجدانا

ولا نغير ف أوضاعنا

فسيبنا نموت ولو هنعيش

نعيش لكن على معنى