ليه يا بن بلدي يا حر حبسوك وانت رمز الطهرحبسوك وانت قلب كبير ونبضه هو كلمة مصر
حبسوك وانت مية نيل بتضوي ويّا نور الفجر
وطيور الغصون مواويل بتسبح بحمد وشكر
وياها النخيل بيميل هيمان ف نشوة ذكر
وبيسأل عن اللي غاب راح فين يا سمانا البدر
وازاي شعب مصر يعيش من غير الهوا والنهر
وازاي العلم يا بلادي هيرفرف بدون النسر
كان شايلك يا مصر وطاير بجناح الأمل والبشر
كان رافع جبينك فوق ومضلل عليه بالفخر
ليه سبتي الحرامي يطير وقصيتي جناح الصقر
كان خايف عليكي موت من شر الفساد والقهر
كان شهم وبطل وجسور في العسر قبل اليسر
وف وقت الخطر تلاقيه بثباته زي الصخر
ليه سيبتي الفساد جبار وحبستي ريات النصر
ورا شمسك يا مصر ف سجنه بيشوف النجوم في الظهر
بيردد نشيد محفور بالنور جوا قلبه حفر
تقريه جوا ضي عنيه من أول لآخر سطر
وسمعنا صدى القضبان بيردد وراه الشعر
أنا صابر ومهما يكون مفتاح الفرج في الصبر
وف حبك عذابي يهون أفديكي وتعيشي يا مصر
أفديكي وتعيشي يامصر
أفديكي وتعيشي يا مصر
This entry was posted
on الثلاثاء، 14 يوليو 2009
at 12:11 ص
and is filed under
زجل
. You can follow any responses to this entry through the
comments feed
.
