ليه يا بن بلدي يا حر حبسوك وانت رمز الطهر
حبسوك وانت قلب كبير ونبضه هو كلمة مصر
حبسوك وانت مية نيل بتضوي ويّا نور الفجر
وطيور الغصون مواويل بتسبح بحمد وشكر
وياها النخيل بيميل هيمان ف نشوة ذكر
وبيسأل عن اللي غاب راح فين يا سمانا البدر
وازاي الوطن هيعيش من غير الهوا والنهر
وازاي العلم فبلادي هيرفرف بدون النسر
كان شايلك يا مصر وطاير بجناح الأمل والبشر
كان رافع جبينك فوق ومضلل عليه بالفخر
ليه سبتي الحرامي يطير وقصيتي جناح الصقر
كان خايف عليكي موت من شر الفساد والقهر
كان شهم وبطل وجسور في العسر قبل اليسر
وف وقت الخطر تلاقيه بثباته زي الصخر
ليه سيبتي الفساد جبار وحبستي ريات النصر
ورا شمسك يا مصر ف سجنه بيعاني ألام الغدر
ونجوم السما ياليل بيشوفها ف عز الضهر
ولو طال الألم يا عين بيرتل ف سورة العصر
ويردد نشيد محفور بالنور جوا قلبه حفر
تقريه جوا ضي عنيه من أول لآخر سطر
وسمعنا صدى القضبان بيردد وراه الشعر
أنا صابر ومهما يكون مفتاح الفرج في الصبر
وف حبك عذابي يهون أفديكي وتعيشي يا مصر
بقلم حسام خليل