نسمة أمل صافي

Posted by حسام خليل in

ياشاعر قول وسمعنا
وداوي جراح بتوجعنا
وحرك حرفك الساكن
ف قلب البيت وجمعنا
على نسمة أمل صافي
وسيبنا نعيش مع المعنى
وقول الكلمة موزونة
ومن قلبك ومتعنا
ومتسيبناش لغربتنا
على الأحزان توزعنا
عشان يطلع كلام موزون
ف بحرالويل تقطعنا
وتعزفنا أنين نازل
بحد السيف يمزعنا
وننزف والنزيف جاري
بحور غرقانه بدموعنا
ف وسط البحر مش لاقيين
لا مركبنا ولا شراعنا
وليه بنصارع الأمواج
إذا كنا خلاص ضعنا
مدام سلمنا أرواحنا
لخاين بالرخيص باعنا
ولما عطشنا خلانا
شربنا الذل وشبعنا
وقلنا الذل يحيينا
أتاري كان بيخدعنا
ولا عشنا ولا متنا
ولا رحنا ولا رجعنا
ما بين دوامة تسحبنا
وبين موجه بترفعنا
ولو جانا الأمل زارع
بييجي اليأس يقلعنا
ويرمينا ف مهب الريح
وفوق الصخر يرزعنا
ونتمنى معاه الموت
نلاقي موت بيمنعنا
ياشاعر قول بإحساسك
ومن دا البحر طلعنا
دي كلمة صدق تحيينا
وع الأهوال تشجعنا
وهز القلب من جوا
ولو ما تهز ودعنا
بإيه هتفيدك القافية
إذا قلنالك اشمعنى
ولو مات الأمل فينا
كلامك مش هينفعنا
ولو قلبك مهوش نابض
بلاش تيجي تصدعنا
وخلينا مع الأموات
وهات شعرك يشيعنا
مهنحسش ولا بكلمة
وقول للصبح سمعنا
هنسمع بس بودانا
ونفضل في مواضعنا
ولا بتهز وجدانا
ولا نغير ف أوضاعنا
فسيبنا نموت ولو هنعيش
نعيش لكن على معنى

This entry was posted on السبت، 12 يونيو 2010 at 3:54 م and is filed under . You can follow any responses to this entry through the comments feed .

3 ممكن رأيك لو سمحت

نعيش لكن على معنى ..

خاتمة جميلة جدا .. فمن حقنا العيش بكرامة

سلمت الأنامل

13 يونيو 2010 في 2:58 م

أم الخلود
لا حياة بدون معنى
أشكر هذا المرور العطر
جزاكم الله خيرا

13 يونيو 2010 في 3:18 م
غير معرف  

جميله جدا ورائعه وفقك الله

19 أبريل 2011 في 4:39 م

إرسال تعليق